ปพฺพชฺชากถา
[2444]
สีลกฺขนฺธาทิยุตฺเตน , สุภกฺขนฺเธน เทสิเต;
ขนฺธเกปิ ปวกฺขามิ, สมาเสน วินิจฺฉยํฯ
[2445]
มาตรา อนนุญฺญาตํ, ปิตรา วาปิ ภิกฺขุโน;
ภณฺฑุกมฺมมปุจฺฉิตฺวา, ปพฺพาเชนฺตสฺส ทุกฺกฏํฯ
[2446]
อุทฺเทสปริปุจฺฉาย, สยํ เจ พฺยาวโฏ สิยา;
ทหโร อาณาเปตพฺโพ, ปพฺพาเชตฺวานยาติ จฯ
[2447]
อุปชฺฌายมถุทฺทิสฺส, อวุตฺโต ทหโร ปน;
ปพฺพาเชติ สเจ ตํ โส, สยเมวาปิ วฏฺฏติฯ
[2448]
สามเณโรปิ วตฺตพฺโพ, ทหโร นตฺถิ ตตฺถ เจ;
‘‘ขณฺฑสีมมิมํ เนตฺวา, ปพฺพาเชตฺวานยา’’ติ จฯ
[2449]
สรณานิ ปเนตสฺส, ทาตพฺพาเนว อตฺตนา;
เอวมฺปิ ภิกฺขุนาเยว, โหติ ปพฺพาชิโต นโรฯ
[2450]
ปุริสํ ภิกฺขุโต อญฺโญ, ปพฺพาเชติ น วฏฺฏติ;
อิตฺถิํ ภิกฺขุนิโต อญฺโญ, ปพฺพาเชติ น วฏฺฏติฯ
[2451]
สามเณโรปิ วา ทาตุํ, สามเณรีปิ วา ตถา;
อาณตฺติยา อุภินฺนมฺปิ, กาสายานิ ลภนฺติ เตฯ
[2452]
สยเมว จ ยํ กิญฺจิ, ปพฺพาเชนฺเตน ภิกฺขุนา;
เกสาปนยนํ กตฺวา, ปฐมํ อุทเก ปุนฯ
[2453]
นฺหาเปตพฺโพ สิยา สุฏฺฐุ, ฆํสิตฺวา โคมยาทินา;
สรีเร ปีฬกา วาปิ, กจฺฉุ วา ตสฺส โหนฺติ เจฯ
[2454]
มาตา ยถา นิยํปุตฺตํ, น ชิคุจฺฉติ สพฺพโส;
นฺหาเปตพฺโพว ยตินา, ตเถว อชิคุจฺฉตาฯ
[2455]
กสฺมา? ปเนตฺตเกนาปิ, อุปกาเรน สาสเน;
โส สทา พลวสฺเนโห, โหตุปชฺฌายกาทิสุฯ
[2456]
วิโนเทตฺวา ปนุปฺปนฺนํ, อุกฺกณฺฐํ กุลปุตฺตกา;
สิกฺขาโย ปริปูเรตฺวา, นิพฺพานํ ปาปุณนฺติ หิฯ
[2457]
คนฺธจุณฺเณน วา ปจฺฉา, จุณฺเณนปิ หลิทฺทิยา;
สรีรํ ตสฺส สีสญฺจ, อุพฺพฏฺเฏตฺวา ปุนปฺปุนํฯ
[2458]
คิหิคนฺธํ วิโนเทตฺวา, กาสายานิ ปเนกโต;
ทฺวตฺติกฺขตฺตุํ สกิํ วาปิ, ทาตพฺพานิสฺส ภิกฺขุนาฯ
[2459]
อถ หตฺเถปิ วา ตสฺส, อทตฺวา สยเมว ตํ;
อจฺฉาเทติ อุปชฺฌาโย, วฏฺฏตาจริโยปิ วาฯ
[2460]
นิวาเสติ อนาณตฺโต, โส ปารุปติ วา สยํ;
อปเนตฺวา ตโต สพฺพํ, ปุน ทาตพฺพเมว ตํฯ
[2461]
ภิกฺขุนา ตุ สหตฺเถน, ตถา อาณตฺติยาปิ วา;
ทินฺนํ วฏฺฏติ กาสาวํ, นาทินฺนํ ปน วฏฺฏติฯ
[2462]
ตสฺเสว สนฺตกํ วาปิ, กา กถา อตฺตสนฺตเก;
วนฺทาเปตฺวา ตตฺถ ภิกฺขู, การาเปตฺวาน อุกฺกุฏิํฯ
[2463]
อญฺชลิํ ปคฺคหาเปตฺวา, ทาตพฺพํ สรณตฺตยํ;
ปฏิปาฏิวเสเนว, น จ อุปฺปฏิปาฏิยาฯ
[2464]
สเจ เอกปทํ วาปิ, เทติ เอกกฺขรมฺปิ วา;
ปฏิปาฏิํ วิรชฺฌิตฺวา, คหิตํ เจ น วฏฺฏติฯ
[2465]
ติกฺขตฺตุํ ยทิ วา เทติ, พุทฺธํ สรณเมว วา;
ตถา เสเสสุ เจวมฺปิ, น ทินฺนาเนว โหนฺติ หิฯ
[2466]
กตฺวานุนาสิกนฺตานิ , เอกาพทฺธานิ วา ปน;
วิจฺฉินฺทิตฺวาถ ม-นฺตานิ, ทาตพฺพานิ วิชานตาฯ
[2467]
อุปสมฺปทกมฺมํ ตุ, เอกโตสุทฺธิยา สิยา;
น โหติ ปน ปพฺพชฺชา, อุภโตสุทฺธิยา วินาฯ
[2468]
ตสฺมา อาจริเยนาปิ, ตถานฺเตวาสิเกนปิ;
พุ-ทฺธ-การาทโย วณฺณา, ฐานกรณสมฺปทํฯ
[2469]
อหาเปนฺเตน วตฺตพฺพา, ปพฺพชฺชาคุณมิจฺฉตา;
เอกวณฺณวินาเสน, ปพฺพชฺชา หิ น รูหติฯ
[2470]
ยทิ สิทฺธาปิ ปพฺพชฺชา, สรณาคมนโตว หิ;
ทาตพฺพา ทส สีลานิ, ปูรณตฺถาย ภิกฺขุนาฯ
ปพฺพชฺชากถาฯ
[2471]
อุปชฺฌายมถาจริยํ, นิสฺสาย วสตา ปน;
กตฺตพฺพาเนว วตฺตานิ, ปิยสีเลน ภิกฺขุนาฯ
[2472]
อาสนํ ปญฺญเปตพฺพํ, ทนฺตกฏฺฐํ มุโขทกํ;
ทาตพฺพํ ตสฺส กาเลน, สเจ ยาคุ ภวิสฺสติฯ
[2473]
ยาคุ ตสฺสุปเนตพฺพา, สงฺฆโต กุลโตปิ วา;
ปตฺเต วตฺตญฺจ กาตพฺพํ, วตฺตํ คามปฺปเวสเนฯ
[2474]
จีวเร ยานิ วตฺตานิ, วุตฺตานิ หิ มเหสินา;
เสนาสเน ตถา ปาท-ปีฐกถลิกาทิสุฯ
[2475]
เอวมาทีนิ วตฺตานิ, สพฺพานิ ปน โรคโต;
วุฏฺฐานาคมนนฺตานิ, สตฺตติํสสตํ สิยุํฯ
[2476]
วตฺตเภเทน สพฺพตฺถ, ทุกฺกฏํ ตุ ปกาสิตํ;
อนาทรวเสเนว, อกโรนฺตสฺส ภิกฺขุโนฯ
อุปชฺฌายาจริยวตฺตกถาฯ
[2477]
อุปชฺฌายสฺส วตฺตานิ, ตถา สทฺธิวิหาริเก;
สตํ เตรส โหนฺเตว, ตถานฺเตวาสิเกปิ จฯ
สทฺธิวิหาริกนฺเตวาสิกวตฺตกถาฯ
[2478]
ปกฺกนฺเต วาปิ วิพฺภนฺเต, ปกฺขสงฺกนฺตเก มเต;
อาณตฺติยา อุปชฺฌายา, ปสฺสมฺภติ จ นิสฺสโยฯ
[2479]
โหติ อาจริยมฺหาปิ, ฉธา นิสฺสยเภทนํ;
ปกฺกนฺเต วาปิ วิพฺภนฺเต, ปกฺขสงฺกนฺตเก มเตฯ
[2480]
อาณตฺติยํ อุภินฺนมฺปิ, ธุรนิกฺเขปเนปิ จ;
เอเกกสฺส อุภินฺนํ วา, นาลเย สติ ภิชฺชติฯ
[2481]
อุปชฺฌายสโมธาน-คตสฺสาปิ จ ภิชฺชติ;
ทสฺสนํ สวนญฺจาติ, สโมธานํ ทฺวิธา มตํฯ
[2482]
อทฺธิกสฺส คิลานสฺส, คิลานุปฏฺฐกสฺส จ;
ยาจิตสฺส น โทโสว, วสิตุํ นิสฺสยํ วินาฯ
[2483]
ชานตา อตฺตโน เจว, วเน ผาสุวิหารตํ;
สภาเค ทายเกสนฺเต, วสิตุมฺปิ จ วฏฺฏติฯ
นิสฺสยปฏิปฺปสฺสมฺภนกถาฯ
[2484]
กุฏฺฐิํ คณฺฑิํ กิลาสิญฺจ, โสสิญฺจ อปมาริกํ;
ตถา ราชภฏํ โจรํ, ลิขิตํ การเภทกํฯ
[2485]
กสาหตํ นรญฺเจว, ปุริสํ ลกฺขณาหตํ;
อิณายิกญฺจ ทาสญฺจ, ปพฺพาเชนฺตสฺส ทุกฺกฏํฯ
[2486]
หตฺถจฺฉินฺนมฬจฺฉินฺนํ, ปาทจฺฉินฺนญฺจ ปุคฺคลํ;
กณฺณนาสงฺคุลิจฺฉินฺนํ, กณฺฑรจฺฉินฺนเมว จฯ
[2487]
กาณํ กุณิญฺจ ขุชฺชญฺจ, วามนํ ผณหตฺถกํ;
ขญฺชํ ปกฺขหตญฺเจว, สีปทิํ ปาปโรคินํฯ
[2488]
ชราย ทุพฺพลํ อนฺธํ, พธิรญฺเจว มมฺมนํ;
ปีฐสปฺปิํ ตถา มูคํ, ปพฺพาเชนฺตสฺส ทุกฺกฏํฯ
[2489]
อติทีโฆติรสฺโส วา, อติกาโลปิ วา ตถา;
อจฺโจทาโตปิ วา มฏฺฐ-ตมฺพโลหนิทสฺสโนฯ
[2490]
อติถูโล อติกิสฺโส, มหาสีโสปิ วา ตถา;
อติขุทฺทกสีเสน, สหิเตน ยุตฺโตปิ วาฯ
[2491]
กุฏกุฏกสีโส วา, ตถา สิขรสีสโก;
เวฬุนาฬิสมาเนน, สีเสน จ ยุโต นโรฯ
[2492]
กปฺปสีโสปิ ปพฺภาร-สีโส วา วณสีสโก;
ตถา กณฺณิกเกโส วา, ถูลเกโสปิ วา ตถาฯ
[2493]
ปูตินิลฺโลมสีโส วา, ชาติปณฺฑรเกสโก;
ชาติยา ตมฺพเกโส วา, ตเถวาวฏฺฏสีสโกฯ
[2494]
สีสโลเมกพทฺเธหิ, ภมุเกหิ ยุโตปิ วา;
สมฺพทฺธภมุโก วาปิ, นิลฺโลมภมุโกปิ วาฯ
[2495]
มหนฺตขุทฺทเนตฺโต วา, ตถา วิสมโลจโน;
เกกโร วาปิ คมฺภีร-เนตฺโต วิสมจกฺกโลฯ
[2496]
ชตุมูสิกกณฺโณ วา, หตฺถิกณฺโณปิ วา ปน;
ฉิทฺทมตฺตกกณฺโณ วา, ตเถวาวิทฺธกณฺณโกฯ
[2497]
ตถา ฏงฺกิตกณฺโณ วา, ปูติกณฺโณปิ วา ปน;
โยนกาทิปฺปเภโทปิ, นายํ ปริสทูสโกฯ
[2498]
อติปิงฺคลเนตฺโต วา, ตถา นิปฺปขุมกฺขิ วา;
อสฺสุปคฺฆรเนตฺโต วา, ปกฺกปุปฺผิตโลจโนฯ
[2499]
ตเถว จ มหานาโส, อติขุทฺทกนาสิโก;
ตถา จิปิฏนาโส วา, นโร กุฏิลนาสิโกฯ
[2500]
นิจฺจวิสฺสวนาโส วา, โย วา ปน มหามุโข;
วงฺกภินฺนมุโข วาปิ, มหาโอฏฺโฐปิ วา ปนฯ
[2501]
ตถา ตนุกโอฏฺโฐ วา, วิปุลุตฺตรโอฏฺฐโก;
โอฏฺฐฉินฺโนปิ อุปฺปกฺก-มุโข เอฬมุโขปิ วาฯ
[2502]
สงฺขตุณฺโฑปิ ทุคฺคนฺธ-มุโข วา ปน ปุคฺคโล;
มหาทนฺโตปิ อจฺจนฺตํ, ตถา อสุรทนฺตโกฯ
[2503]
เหฏฺฐา อุปริโต วาปิ, พหินิกฺขนฺตทนฺตโก;
อทนฺโต ปูติทนฺโต วา, อติขุทฺทกทนฺตโกฯ
[2504]
ยสฺส ทนฺตนฺตเร ทนฺโต, กาฬกทนฺตสนฺนิโภ;
สุขุโมว ฐิโต, ตํ เจ, ปพฺพาเชตุมฺปิ วฏฺฏติฯ
[2505]
โย มหาหนุโก โปโส;
ทีเฆน หนุนา ยุโต;
จิปิฏหนุโก วาปิ;
รสฺเสน หนุนา ยุโตฯ
[2506]
นิมฺมสฺสุทาฐิโก วาปิ, อติทีฆคโลปิ วา;
อติรสฺสคโลปิ วา, ภินฺนคณฺฐิคโลปิ วาฯ
[2507]
ตถา ภฏฺฐํสกูโฏ วา, ภินฺนปิฏฺฐิอุโรปิ วา;
สุทีฆรสฺสหตฺโถ วา, กจฺฉุกณฺฑุสมายุโตฯ
[2508]
มหานิสทมํโส วา, อุทฺธนคฺคุปมายุโต;
วาตณฺฑิโก มหาอูรุ, สงฺฆฏฺฏนกชาณุโกฯ
[2509]
ภินฺนชาณุ มหาชาณุ, ทีฆชงฺโฆ วิชงฺฆโก;
วิกโฏ วาปิ ปณฺโห วา, ตถา อุพฺพทฺธปิณฺฑิโกฯ
[2510]
ยฏฺฐิชงฺโฆ มหาชงฺโฆ, มหาปาโทปิ โย นโร;
ตถา ปิฏฺฐิกปาโท วา, มหาปณฺหิปิ วา ปนฯ
[2511]
วงฺกปาโท นโร โย วา, คณฺฐิกงฺคุลิโกปิ วา;
โย ปนนฺธนโข วาปิ, กาฬปูตินโขปิ จฯ
[2512]
อิจฺเจวมาทิกํ กญฺจิ, นรํ ปริสทูสกํ;
ปพฺพาเชนฺตสฺส ภิกฺขุสฺส, โหติ อาปตฺติ ทุกฺกฏํฯ
ปริสทูสกกถาฯ
[2513]
‘‘สามเณรชฺช มา ขาท, มา ภุญฺช จ ปิวา’’ติ จ;
นิวาเรนฺตสฺส อาหารํ, โหติ อาปตฺติ ทุกฺกฏํฯ
[2514]
‘‘นิวาเรสฺสามิ อาหาร’’-มิติ วา ปตฺตจีวรํ;
อนฺโต นิกฺขิปโต สพฺพ-ปโยเคสุปิ ทุกฺกฏํฯ
[2515]
ทุพฺพจสามเณรสฺส, อนาจารสฺส เกวลํ;
ทณฺฑกมฺมํ หเว กตฺวา, หิตกาเมน ภิกฺขุนาฯ
[2516]
ยาคุํ วา ปน ภตฺตํ วา, ทสฺเสตฺวา กิร ภาสิตุํ;
‘‘อาหเฏ ทณฺฑกมฺเม ตฺวํ, ลจฺฉสีท’’นฺติ วฏฺฏติฯ
[2517]
อปราธานุรูเปน , ทณฺฑกมฺมํ ตุ การเย;
วาลิกาสลิลาทีน-มาหราปนเมว ตํฯ
[2518]
สีเส วา นิกฺขิปาเปตุํ, ปาสาณาทีนิ กานิจิ;
นิปชฺชาเปตุมุณฺเห วา, ปาสาเณ ภูมิยาปิ วาฯ
[2519]
อุทกํ วา ปเวเสตุํ, น จ วฏฺฏติ ภิกฺขุโน;
อิธาวรณมตฺตํ ตุ, ทณฺฑกมฺมํ ปกาสิตํฯ
นิวารณกถาฯ
[2520]
ปกฺโขปกฺกมิกาสิตฺตา, จตุตฺโถ ปนุสูยโก;
นปุํสเกน ปญฺเจเต, ปณฺฑกา ปริทีปิตาฯ
[2521]
เตสุ อาสิตฺตุสูยานํ, ปพฺพชฺชา น นิวาริตา;
อิตเรสํ ตุ ติณฺณมฺปิ, ปณฺฑกานํ นิวาริตาฯ
[2522]
วาริตา ยสฺส ปพฺพชฺชา, นาเสตพฺโพติ โส มโต;
ติวิเธ ปน เต ญตฺวา, ปพฺพาเชนฺตสฺส ทุกฺกฏํฯ
ปณฺฑกกถาฯ
[2523]
ลิงฺคตฺเถโน จ สํวาส-ตฺเถโน ตทุภยสฺส จ;
เถยฺยสํวาสโก นาม, ติวิโธปิ ปวุจฺจติฯ
[2524]
สยเมว จ โย ตตฺถ, ปพฺพชิตฺวา น คณฺหติ;
ภิกฺขุวสฺสานิ วา เนว, ยถาวุฑฺฒมฺปิ วนฺทนํฯ
[2525]
ลิงฺคตฺเถโน อยํ ลิงฺค-มตฺตสฺส เถนโต สิยา;
โย จ ปพฺพชิโต หุตฺวา, ภิกฺขุวสฺสานิ คณฺหติฯ
[2526]
สํวาสํ สาทิยนฺโตว, สํวาสตฺเถนโก มโต;
อุภยตฺเถนโก วุตฺต-นโยเยว, ยถาห จฯ
[2527]
‘‘ราชทุพฺภิกฺขกนฺตาร-โรคเวริภเยหิ วา;
จีวราหรณตฺถํ วา, ลิงฺคมาทิยตีธ โยฯ
[2528]
สํวาสํ นาธิวาเสติ, ยาว โส สุทฺธมานโส;
เถยฺยสํวาสโก นาม, ตาว เอส น วุจฺจติ’’ฯ
เถยฺยสํวาสกกถาฯ
[2529]
‘‘ติตฺถิโยหํ ภวิสฺส’’นฺติ, อุปสมฺปนฺนภิกฺขุ เจ;
สลิงฺเคเนว โย ยาติ, ติตฺถิยานมุปสฺสยํฯ
[2530]
คจฺฉโต ปทวาเรน, โหติ อาปตฺติ ทุกฺกฏํ;
โหติ ติตฺถิยปกฺกนฺโต, ลิงฺเค เตสํ ตุ นิสฺสิเตฯ
[2531]
‘‘ติตฺถิโยหํ ภวิสฺส’’นฺติ, กุสจีราทิกํ ปน;
สยเมว นิวาเสติ, โสปิ ปกฺกนฺตโก สิยาฯ
[2532]
นคฺโค อาชีวกาทีนํ, คนฺตฺวา เตสํ อุปสฺสยํ;
ลุญฺจาเปติ สเจ เกเส, วตฺตานาทิยตีธ วาฯ
[2533]
โมรปิญฺฉาทิกํ เตสํ, ลิงฺคํ คณฺหาติ วา สเจ;
สารโต เจว วา เตสํ, ปพฺพชฺชํ ลทฺธิเมว วาฯ
[2534]
โหติ ติตฺถิยปกฺกนฺโต, น ปเนส วิมุจฺจติ;
นคฺคสฺส คจฺฉโต วุตฺตํ, ปทวาเรน ทุกฺกฏํฯ
[2535]
วุตฺโต อนุปสมฺปนฺน-วเสน เถยฺยวาสโก;
ตถา ติตฺถิยปกฺกนฺโต, อุปสมฺปนฺนภิกฺขุนาฯ
ติตฺถิยปกฺกนฺตกถาฯ
[2536]
นาโค วาปิ สุปณฺโณ วา, ยกฺโข สกฺโกปิ วา อิธ;
ติรจฺฉานคโต วุตฺโต, ปพฺพาเชตุํ น วฏฺฏติฯ
ติรจฺฉานกถาฯ
[2537]
ปญฺจานนฺตริเก โปเส, ปพฺพาเชนฺตสฺส ทุกฺกฏํ;
อุภโตพฺยญฺชนญฺเจว, ตถา ภิกฺขุนิทูสกํฯ
[2538]
เอกโตอุปสมฺปนฺนํ, ภิกฺขุนีนํ ตุ สนฺติเก;
ทูเสตฺวา ปน โส เนว, ภิกฺขุนีทูสโก สิยาฯ
[2539]
สเจ อนุปสมฺปนฺน-ทูสโก อุปสมฺปทํ;
ลภเตว จ ปพฺพชฺชํ, สา จ เนว ปราชิตาฯ
เอกาทสอภพฺพปุคฺคลกถาฯ
[2540]
นูปสมฺปาทนีโยว , อนุปชฺฌายโก นโร;
กโรโต ทุกฺกฏํ โหติ, น กุปฺปติ สเจ กตํฯ
[2541]
กุปฺปตีติ วทนฺเตเก, น คเหตพฺพเมว ตํ;
เสเสสุปิ อยํ เญยฺโย, นโย สพฺพตฺถ วิญฺญุนาฯ
[2542]
อุปสมฺปทกมฺมสฺส, อภพฺพา ปญฺจวีสติ;
อชานิตฺวา กโต จาปิ, โอสาโร นาสนารโหฯ
[2543]
หตฺถจฺฉินฺนาทิพาตฺติํส, กุฏฺฐิอาทิ จ เตรส;
อปตฺโต เตสโมสาโร, กโต เจ ปน รูหติฯ
[2544]
เอกูปชฺฌายโก โหติ;
โหนฺติ อาจริยา ตโย;
อุปสมฺปทาเปกฺขา จ;
โหนฺติ ทฺเว วา ตโยปิ วาฯ
[2545]
ตีหิ อาจริเยเหว, เอกโต อนุสาวนํ;
โอสาเรตฺวา กตํ กมฺมํ, น จ กุปฺปติ กปฺปติฯ
[2546]
เอกูปชฺฌายโก โหติ;
อาจริโยปิ ตเถกโต;
อุปสมฺปทาเปกฺขา จ;
โหนฺติ ทฺเว วา ตโยปิ วาฯ
[2547]
อนุปุพฺเพน สาเวตฺวา, เตสํ นามํ ตุ เตน จ;
เอกโต อนุสาเวตฺวา, กตมฺปิ จ น กุปฺปติฯ
[2548]
นานุปชฺฌายเกนาปิ, นานาจริยเกน จ;
อญฺญมญฺญานุสาเวตฺวา, กตํ กมฺมญฺจ วฏฺฏติฯ
[2549]
สุมโน ติสฺสเถรสฺส, อนุสาเวติ สิสฺสกํ;
ติสฺโส สุมนเถรสฺส, อนุสาเวติ สิสฺสกํฯ
[2550]
นานุปชฺฌายเกเนว, เอกาจริยเกนิธ;
อุปสมฺปทา ปฏิกฺขิตฺตา, พุทฺเธนาทิจฺจพนฺธุนาฯ
มหาขนฺธกกถาฯ
อุโปสถกฺขนฺธกกถา
[2551]